Ekoetxea Añana-Sobron Ebro ibaiak zeharkatzen duen haitzarte eder batean dago, Hegaztientzako Babes Bereziko Eremu (HBBE) eta Natura 2000 Sareko Kontserbazio Bereziko Eremu (KBE) izendatutako lurralde baten barruan. Paisaia menditsua da, eta biodibertsitate aberatsa du, arriskuan dauden espezieak eta batasunaren intereseko habitatak barne.

Paisaia horrek interes geomorfologiko handia du: kareharrizko paredoiak, baso-masa trinkoz estalitako mazelak, errekak eta sakanak, haitzarteak eta putzuak. Horiek guztiek erakargarritasun handia ematen diote espazioari. Gainera, Sobronen dago Arabako eta EAEko itsas pinuaren enklabe natural bakarra.

Sobronen sona lurpeko ur mineral-sendagarriengatik dator. XIX. mendean, uraren handitasunaren eta garrantziaren erakusgarri izan zen bainuetxe bat eraiki zen. Ba al zenekien Sobrongo urari Vichy Español deitu ziotela, botilaratua eta Kubara esportatua? Gainera, Espainiako Errege Etxea zuzenean hornitzen zen.