Intsektuen Hotela

Tailer honetan sormen- eta parte-hartze gune bat partekatzera gonbidatzen zaituztegu. Bertan, gure intsektuen hotela eraikiko dugu, hainbat material natural eta berrerabili erabiliz, intsektu-espezie desberdinentzako babesleku txikiak sortzeko.

Jarduera honen bidez, intsektuek gure ekosistemetan duten garrantzia eta polinizazioa, materia organikoaren deskonposizioa edo elikadura-kateen oreka bezalako prozesu garrantzitsuetan betetzen duten eginkizuna ezagutuko dugu. Halaber, ekintza txikien bidez intsektu txiki horien bizi-baldintzak hobetzen eta inguratzen gaituen biodibertsitatea bultzatzen lagun dezakegula ikasiko dugu.

Eraikuntza-prozesuan zehar, hainbat forma, material eta egiturarekin esperimentatuko dugu, elementu bakoitzak intsektuentzako babes- edo atsedenleku bat nola eskain dezakeen behatuz. Gainera, zeuen materialak ekartzen badituzue, adibidez fruta kaixa bat edo egurrezko beste zerbait, tailerrean erabili eta zuen intsektuen hotela pertsonalizatu ahal izango duzue, jarduera amaitzean etxera eramateko.

Jarduerak naturara jakin-minaren eta sormenaren bidez hurbiltzeko aukera emango digu, izaki bizidun guztien garrantzia baloratzen ikasiz, baita askotan oharkabean pasatzen direnena ere.

Horrela, intsektuen hotel bat eraikitzea sortzeko, esperimentatzeko eta ezagutzeko aukera bihurtzen da, gure ingurunea zaintzeko eta biodibertsitatea keinu txikien bidez sustatzeko moduari buruz hausnartzen dugun bitartean. Ez da aldez aurreko esperientziarik behar, sortzeko eta naturako biztanle txikiak pixka bat hobeto ezagutzeko gogoa besterik ez!