Txingudiko Ekoetxea ingurumen-zentroak sentsibilizazio-esperientzia berri bat garatu du: “Izan zaitez zirkularra eta zaindu ezazu zure ingurunea”. Esperientzia horren bidez, Easo prestakuntza-zentroko ingurumen-ikasketetako lehen zikloko ikasle-talde bat inplikatu du, naturaguneak kontserbatzeari eta ekonomia zirkularraren sustapenari buruz kontzientziatzeko helburuarekin.
Esperientzia honen bidez, apirilaren 19an eta 20an, Easo prestakuntza-zentroko ingurumen-ikasketetako lehen zikloko ikasleek ekimen batean parte hartu zuten. Bertan, joko-dinamika baten bidez, ekonomia zirkularraren onurak agerian jarri ziren, ekonomia linealarekin alderatuta; era berean, ekonomiak ekosistemen, habitaten eta, oro har, gure ingurunearen kontserbazioan duen eragina aztertu zuten. Hala, aukera izan dute ziklo honetako prestakuntza-curriculumean jasotako edukiak eta gaitasunak praktikan jartzeko eta lotzeko; beraz, Ekoetxea Sarea irakasleentzako eta hezkuntza formalaren sektorearentzako bideratzaile handian bihurtu da.
Esperientzia
Jarduerari ekin baino lehen, Txingudiko hezitzaile-taldea Easo ikastetxean izan zen abiatze-prozesu bat egiteko. Prozesu horren baitan, ekonomia zirkularrarekin lotutako kontzeptuak metodologia gamifikatu baten bidez finkatzeaz gain, ikasleek esperientzian zehar taldeka izango zuten zeregina azaldu zen, baita jokabide zehatzen bidez nola inplika zitezkeen azaldu ere.
Behin ekoetxera iritsitakoan, taldeek egun erdiko abentura hasi zuten Jaitzubiko paduran, non, historian zehar ekonomia zirkularraren aldeko apustua egin baita, jasangarritasunetik eta ingurumenarekiko errespetutik abiatuta. Ikasleek geolokalizazioa eta asmamena baliatu zituzten mapa zati batekin orientatu eta aurre egin beharreko erronkak aurkitzeko. Parte-hartzaileek, taldeka, konpromisoa hartu zuten hilabetez ekonomia zirkularrarekin lotutako ekintza jasangarri bat garatzeko, eta, emaitzak ebaluatu ondoren, sari bat eskuratzeko aukera izango dute.
Esperientzia hori baliagarria da, besteak beste, ekonomia zirkularrak ekonomia linealaren arriskuen aurrean dituen abantailak erakusteko eta balioesteko; ekosistemen kontserbazio-arazoen aurrean ekonomia zirkularraren kulturan oinarritutako irtenbideak planteatzeko; biodibertsitate naturalaren galera eta biodibertsitate kulturalaren galera-prozesuak identifikatzeko, eta habitaten kontserbazioan eragin negatiboa duten kultura modernoaren ekintzak aztertzeko eta identifikatzeko.
Ekonomia zirkularra Euskadin
Euskadik urteak daramatza ekonomia zirkularraren arloan arrakastaz lan egiten. 2000. urtetik hona, euskal ekonomia % 26 hazi da; materialen kontsumoa, berriz, % 25 jaitsi da eta zabortegian amaitzen duen hiri-hondakinen bolumena % 56 murriztu da.
Euskadiko industria-sektoreak urtean 21 milioi tona lehengai kontsumitzen ditu. Euskal industriak kontsumitzen dituen lehengaien % 77 inportatzen ditu. Horrek erakusten du Euskadik kanpoaldearekiko mendekotasun handia duela.
Soluzio berritzaile zirkularragoak hartuko balira, batez beste lehengaien kontsumo horren % 6 aurreztea lortuko litzatekeela kalkulatu da, beraz, euskal industriak 2.000 milioi euro aurreztuko lituzke.
Euskadiko 150 industria-enpresa baino gehiago dagoeneko ari dira praktika edo eredu zirkularrak aplikatzen.
Ikuspegi horiek lantzen dituzten enpresen % 60k adierazi du funtsezkoa dela irizpide horiek beren negozioan edo produktuan sartzea, besteak beste, prozesuen produktibitatea handitzeko, energia-kontsumoa murrizteko, materialak aurrezteko, salmentak handitzeko, nazioarteko merkatuetan bereizteko, merkatu berriak irekitzeko, irudia hobetzeko eta barne-gaitasunak handitzeko.
