Ekoetxea Sareak jarduera ugarirekin ospatuko du 2026ko Uraren Munduko Eguna
Bisita gidatuak, parte hartzeko tailerrak, erakusketak, familia-jarduerak eta hezkuntza-proposamenak dira Ekoetxea Sareko zentroetan gozatu ahal izango diren esperientzietako batzuk, 2026ko Uraren Munduko Eguna dela-eta, martxoaren 21 eta 22ko asteburuan. Programazio guztia doakoa da, eta Euskadiko herritarrei zuzenduta dago.
“Ura bizitza da. Zaintzea geure burua zaintzea da” lelopean, Euskadiko ingurumen-zentroen sareak diseinatutako jarduerek arreta berezia jarriko dute sare osoak partekatzen duen zeharkako mezu batean: “ura baliabide natural bat izateaz gain, ondare komuna eta erantzukizun kolektiboa da”. Ibaiak, akuiferoak eta urarekin lotutako ekosistemak babestea funtsezkoa da lurraldearen osasunerako, herritarren ongizaterako eta klima-aldaketara egokitzeko.
Uraren Munduko Eguna Nazio Batuen Batzar Nagusiak 1992an sortutako nazioarteko hitzordua da, eta funtsezko baliabide horren garrantziaz, kudeaketa jasangarriaz eta klima aldaketaren aurrean duen funtsezko rolaz hausnartzeko sortu zuen.
Bereziki, efemeride horrekin bat eginez, Añana-Sobrón Ekoetxeak, Uraren Museoa izan zenak, “Ibaiertzeko basoa: ibaiaren aterpea eta basoko bizitzaren babeslekua” erakusketa hartuko du, ekosistema funtsezkoenetako baten –eta, aldi berean, mehatxatuenetako baten–, ibaiertzetako basoen eta landarediaren, ezagutza eta balorazioa sakontzeko sortua. Erakusketak, argazkien, ilustrazioen, infografien eta ikus-entzunezko pieza baten bidez, eremu horien aberastasun ekologikoa eta ibai-paisaiaren orekan betetzen duten eginkizuna balioesten du.
Erakusketa datorren azaroaren 26ra bitartean bisitatu ahal izango da. Erakusketa horri tailer zientifikoak, parte hartzeko jarduerak eta familian partekatzeko diseinatutako proposamenak gehituko zaizkio.
Zientzia, parte-hartzea eta familia-jarduerak
Gainera, Ekoetxe horrek beste hainbat jarduera ere antolatuko ditu, besteak beste, AZTERTU tailerrak, “Ura deskubritu, bizitza zaindu” izenburupean, parte-hartzaileei erakutsiko dietenak nola aztertu ibaiko ur-laginak eta nola neurtu, besteak beste, pH-a, uhertasuna edo oxigeno disolbatua.
Beste jarduera batzuk dira: Let’s Clean Up Euskadi, Ekoetxearen inguruko garbiketa-ekintza, eta Ebro ibaiko laginak ere hartuko dira analisi fisiko-kimikoa egiteko; “Putzua ikusgai” haurrentzako antzerkia, jolasaren eta umorearen bidez uraren balioari buruz hausnartzeko; eta “Ura ura baino gehiago da” eta “Uraren balioan nabigatzen” jarduerak, funtsezko baliabide horren ingurumen-, gizarte- eta ekonomia-dimentsioan oinarrituta.
Ingurumen-hezkuntza: ikastetxeentzako jardunaldia
Jende guztiari irekitako jarduerez gain, Ekoetxeak jardunaldi birtual bat antolatu du martxoaren 27rako ikastetxeei zuzenduta, jolasaren bidez ingurumen-hezkuntzak ohiturak aldatzea eta ura txikitatik zaintzeko erantzunkidetasun-kultura sustatzeko duen rola indartzeko.
Programa hori Ekoetxea Sareko gainerako zentroetan, Urdaibaiko, Meatzaldeko, Azpeitiako eta Txingudiko ekoetxeetan, osatuko da beren lurralde-testuinguruetara egokitutako esperientziekin.
Programazio guztia eguneratuta eta esperientzia bakoitzari buruzko xehetasunak ekoetxea.eus webgunean kontsulta daitezke.
