Keinu txiki bakoitzak garrantzia duela kontuan hartuta, Ekoetxea Meatzaldea Euskadiko ingurumen hezkuntzako zentroak bat egin du, beste behin, Zuhaitz Egunarekin, eta martxoaren 17an dagoeneko hasi ziren landaketekin. 1995. urtetik, Zuhaitzaren Eguna Peñas Negrasen inguruan ospatzen den lehen urtetik, 12000 pertsonak baino gehiagok egin dute bat kausarekin, eta 2500 zuhaitz autoktono baino gehiago landatu dituzte.
Giza jardueraren ondorioz, planetako baso primarioen %78 inguru suntsitu dira dagoeneko, eta gainerako %22a egurra eskuratzeko erabiltzen da. Ingurumenaren degradazioak eragin zuzena du, ez bakarrik gure ingurumenarekin, hots, atmosferara CO2 isurtzearekin, baita gure biodibertsitatearekin ere, milaka espezie desagertzeko zorian egoteraino. Zuhaitz Eguna martxoaren 21n egiten da urtero, eta zuhaitz azalerak eta basoak zaintzearen garrantzia gogorarazten digu. Zuhaitzek, beste onura askoren artean, berotegi efektuaren erantzule den karbono dioxidoa eraldatu egiten dute, uholde arriskuak txikiagotzen dituzte eta higadura saihesten dute, besteak beste.
Aspaldidanik, Euskadiko Ingurumen Zentroen Sareak ekimen hori bultzatu izan du, ezkerraldeko komunitatea misio bateratu batean elkartuz: klima aldaketari aurre egitea, zuhaitz autoktonoak landatuta ingurunea biziberrituz, eta, horrela, eremuko biodibertsitatea indartuz –biodibertsitate horrek aurreko hamarkadetako meatzaritzako industria inpaktua du ezaugarri nagusitzat–.
Horrela, urtez urte handitzen jarraitzen duen partaidetza izaten da Ekoetxea Meatzaldea zentroan –oraingoan 300 pertsonak baino gehiagok egin dute bat kausarekin– , eta , hala, irmo eusten zaio gure ingurunea babesteko konpromisoari. Konpromiso hori abiapuntu hartuta, inplikatutako pertsona, elkarte eta erakunde guztiek 75 zuhaitz autoktono baino gehiago landatu dituzte.
Ekoetxea Sareak abian jartzen dituen esperientzia horiek etorkizun berdeago eta erresilienteago bat eraikitzeko aletxo bat gehiago dira. Zuhaitz autoktonoak landatzean, tokiko biodibertsitatea sustatzeaz gain, egungo ingurumen erronkekiko orekatuagoa eta erresistenteagoa den ekosistema baterako oinarriak ezartzen ere ari gara.
Ekimenak, gainera, tokiko komunitateak bere ingurunearekin dituen ingurumen helburu zabalagoak lortzeko lankidetza eta konpromiso indibidualaren boterea islatzen du. Arrakasta ez da landatutako zuhaitz kopuruaren arabera bakarrik neurtzen, baita kausa komun baten inguruko lotura eta konpromiso komunitarioak sortuta ere.
Ihobek –Eusko Jaurlaritzaren Ingurumen Jarduketarako Sozietate Publikoa– kudeatzen duen Ekoetxea Sareak egunero lanean jarraitzen du, inspirazio iturri izan nahian, herritarrek aldaketarekin bat egin dezaten, beren egunerokoan keinu jasangarriak hartzera bultzatzen duten esperientzien bidez, etorkizun hobea eraikitzeko.
